Жыл басынан Кегендегі аудандық ауруханасына қарасты оңалту орталығында 12 млн теңгеге жуық қаржыға 60-қа тарта бала тегін емдеуден өтті. Мұндай мүмкіндік денсаулығында кінәраты бар жеткіншектерге міндетті әлеуметтік медициналық сақтандыру жүйесі арқылы қолжетімді болып отыр. Орталықта жүйке жүйесі, тірек-қимыл аппараты бұзылған, жүрек, өкпе мен тыныс алу жолдарында ақауы бар науқастар емделеді. Балалар портал арқылы қабылданып, орталықта ата-аналарымен бірге уақыт өткізеді. Бұл «Міндетті әлеуметтік медициналық сақтандыру қоры» КЕАҚ Алматы облыстық филиалы өкілдерінің медициналық ұйымға сапары барысында белгілі болды. Алдымен мамандар орталықтағы ата-аналармен тілдесті.
«Үш қыздың анасымын. Тұңғышым церебральды сал ауруының жеңіл түріне шалдыққан. Орталықта жетінші күні ем алып жатырмыз. Нәтижесі жақсы. МӘМС арқылы портал бойынша 15 күнге келдік. Диагнозына байланысты барлық медициналық көмекті алып жатыр. Өзіне массаж, ванна кабинеттері ұнайды. Енді әр үш ай сайын оңалтудан өтіп тұрамыз», — дейді сұхбат барысында аудан тұрғыны Гүлдана Жақсылықова.
Бұл мекеме осы жылдың тамыз айында іске қосылған. 240 млн теңгеге қажетті медициналық құрал-жабдықтармен қамтамасыз етіліпті. Олардың ішінде мүгедектерге арналған арбалар, иппотерапия тренажеры және физио, эрго, жарық сынды терапияларды қамтитын құрылғылар, әртүрлі ойыншықтармен жабдықталған. Жалпы орталық жыл сайын Қазақстан бойынша 600-ге тарта емделушіні қабылдауға әзір. Аудандық аурухананың медицина қызметкерлері «Қазақстан Халқына» қоғамдық қорының демеушілігімен балалар оңалту орталығына орнатылған аппараттарды қолдану жөнінде оқытудан және нұсқамадан өткізілді.
«Бұл балалар оңалту орталығы жалпы 25 төсек-орындық. Тәулік бойы стационар бар және 5 төсек күндізгі стационар және амбулаторлық түрде науқастарды қабылдауға арналған. Орталық ашылған кезде Кеген, Ұйғыр, Райымбек аудандарындағы оңалтуды қажет ететін балаларға арналған болатын. Яғни 3 ауданды қоса алғанда 450-ге тарта жеткіншекті оңалтуды қажет ететін балалар бар. Бұрын соңды мұндай мүмкіндік аудан аумағында жоқ болатын. Ерекше балалар Астана, Алматы сынды ірі қалаларға жіберілетін. Қазірде Кегенде демеушілер көмегімен керемет орталығымыз ашылып, балалар портал арқылы тегін ем қабылдап жатыр. Бұл МӘМС жүйесінің жетістігі, мүмкіндігі деп білеміз», — дейді Кеген аудандық ауруханасының директоры Алмас Тілеулиев.
Оңалту орталығында 2 балалар невропатологі, 2 реабилитолог, 8 емдік дене шынықтыру нұсқаушысы, 2 эрготерапевт, 1 психолог, 4 логопед, 3 дефектолог мамандар жұмыс істейді. Олар «Қамқорлық» қорының демеушілігімен Астана қаласындағы «Балалар реабилитациясы ғылыми оталығында білімдерін жетілдірген. Іс-сапар барысында қор өкілдері осы мамандармен кездесті. Әрбірінің толғандырған сұрақтарына жауап берді. Мәселен, қызметкерлердің жарна мөлшері, олардың қандай медициналық қызметке қолжетімділігі, құқықтары туралы кеңінен әңгіме қозғалды. Бұл кездесудің мақсаты да сол еді.
«Жұмыс берушілер МӘМС төлемдерінің екі түрін жасайды: 1) олар ай сайын қызметкер жалақысының 3% мөлшерінде өз қаражатынан төлейтін аударымдар. Ай сайынғы аударымдардың ең жоғары сомасы айына 10 еселенген ЕТЖ**-дан 3% — дан немесе 2024 жылы 25500 теңгеден аспауы тиіс. Аударымдар үшін төлем тағайындау коды (КНП) — 121; 2) жарналар. Олардың жұмыс берушісі қызметкердің жалақысынан ай сайын 2% ұстайды. Мұнда да жоғарғы шек бар, айына 10 еселенген ЕТЖ-дан 2%-ы одан артық жұмыс беруші төлемеуі тиіс немесе 2024 жылы 17000 теңге. Егер қызметкер бірнеше жерде еңбек етсе, барлық жұмыс орындарынан МӘМС жарналарының сомасы ай сайын 17000 теңгеден аспауы тиіс. Жарналар үшін төлем тағайындау коды (КНП) — 122. Ақылы жұмыстарды немесе қызметтерді көрсету үшін қабылданған тұлғалардың МӘМС аударымдарын салық агенті* (жұмыс беруші) қызметкерлерге төлеген сияқты аударады. Жарналар үшін төлем мақсатының коды (PNC) — 122″, — дейді жиында сөз алған филиал қызметкері Әкімбек Саурықбаев.
Жалпы, ұйымдастырушылар медициналық ұйым жұмысшыларымен ғана емес, Алматы облысындағы ірі кәсіпорын қызметкерлерімен кездесуді де жоспарлап отыр.
Әлеуметтік медициналық сақтандыру қоры Алматы облыстық филиалының баспасөз қызметі
