7-9 маусым аралығында Витебск облысы, Поставы қаласында «Звіняць цымбалы і гармонік» халықаралық фестивалі өтті.
Аталмыш шараға Қазақстан, Грузия, Россия, Литва, Беларусь мемлекеттерінің өнерпаздары қатысты. Сүйінбай атындағы Алматы облыстық филармониясы қазақ елінің абыройын арқалап, жүлделі болып қайтты.
Бірнеше күнге жалғасқан фестивальде «Сазген» фольклорлы-этнографиялық ансамбльі, «Алтынай» мемлекеттік халық би ансамбльі, домбырашылар мен жеке дауыстағы әншілер көрермен көзайымына айналып, ұлт мәдениетін ұлықтады. Өнерпаздар түрлі номинация бойынша 4 жүлделі орын алды.
«Фестиваль аясында алғашқы күні жеке концерт қойдық. Одан кейін конкурсқа қатыстық. Бұл байқауға бір ай дайындалдық. Көпшілік өнерімізді жоғары бағалап, трио номинациясы бойынша жүлделі 1-орын иелендік. Өте қуаныштымыз, ұйымдастырушыларға ұжымның атынан алғыс айтамыз», — деді «Сазген» фольклорлы-этнографиялық ансамблінің концертмейстері Бейбіт Темірхан.
Айта кетейік, аталмыш шара дәстүрлі түрде ұйымдастырылады. Биыл фестивальде 120-ға жуық әртіс өнер көрсетті.