Еңбекшіқазақ аудандық мәслихат төрағасы Ахметов Бекет Төлегенұлы «AMANAT» партиясының аудандық филиалында аудан тұрғындарының арыз-өтініштері бойынша кезекті қоғамдық қабылдауын өткізді.
Қабылдауға келген азаматтар тұрғын үй кезегіне тұру, жер телімін алу, инфрақұрылым, әлеуметтік көмек және өзге де маңызды мәселелерді көтерді. Тұрғындардың талап-тілектерін тыңдаған Ахметов Бекет Төлегенұлы көтерілген әрбір мәселе бақылауға алынатынын және олардың шешу жолдары қарастырылатынын атап өтті.
«Халықтың мұң-мұқтажын тыңдау – біздің негізгі міндетіміз. Әрбір азаматтың көтерген мәселесі маңызды, себебі бұл – күнделікті өмір сапасына тікелей әсер ететін сұрақтар. Тұрғын үй, жер телімі, инфрақұрылым, әлеуметтік көмек – бәрі де қоғам үшін өзекті мәселелер. Осы бағытта біз тұрғындардың өтініштерін заң аясында қарастырып, оларды шешу үшін тиісті мекемелермен бірлесе жұмыс істейміз. Біздің мақсатымыз – халық пен билік арасындағы байланысты нығайтып, азаматтардың мәселесін жедел әрі сапалы шешу. Сондықтан да, бүгінгі қабылдау барысында әрбір өтінішті мұқият тыңдап, заң аясында кеңес бердік. Көтерілген мәселелер бақылауға алынып, алдағы уақытта олардың оң шешілуі үшін жұмыс жүргізіледі», – деді Ахметов Бекет Төлегенұлы.
Қабылдау барысында тұрғындарға заң аясында түсіндірме жұмыстары жүргізіліп, бірқатар өтініштер тиісті сала мамандарына жолданды. Сонымен қатар, жергілікті атқарушы органдармен бірлесіп, жүйелі жұмыстар атқарылатыны айтылды.
Айта кетейік, «AMANAT» партиясының аудандық филиалы тұрғындардың әлеуметтік, экономикалық және құқықтық мәселелерін шешу бағытында тұрақты түрде қоғамдық қабылдаулар ұйымдастырып келеді.
