Жетісу облысының 358 елді мекені бас жоспарлармен толық қамтамасыз етілді

Жетісу облысында сәулет және қала құрылысы саласында мемлекеттік саясатты іске асыру жүйелі түрде жүргізілуде. Бұл туралы Жетісу облысының Сәулет және қала құрылысы басқармасының бөлім басшысы Асанәлі Жанабай мәлімдеді.
Басқарма мәліметінше, қазіргі уақытта облыстың 358 елді мекені бас жоспарлармен толық қамтамасыз етілген. Қажеттілігіне қарай жоспарларға түзетулер енгізілуде. Сонымен қатар, егжей-тегжейлі жоспарлау жобалары 16,8% немесе 60 елді мекенді қамтиды.
2024 жылы қала құрылысы жобаларын түзету жұмыстары аяқталмақ. Қазіргі таңда жобалар «Мемсараптама» РМК-да сараптамадан өткізілуде. Құжаттарды әзірлеу барысында қоғамдық ұйымдар мен әкімдік құрылымдарының қатысуымен қоғамдық талқылаулар ұйымдастырылған.
Облыста тұрғын үй құрылысы да бақылауда. Жыл соңына дейін барлық қаржыландыру көздері есебінен пайдалануға берілген тұрғын үйлер бойынша мәліметтер жинақталмақ. Аудандық және қалалық құрылыс бөлімдері тұрғын үйді қабылдау актілері мен сәулет-жоспарлау тапсырмаларының мәліметтерін мемлекеттік қала құрылысы кадастрына тұрақты түрде енгізіп отырады.
Айта кетейік, облыста «Қылмыстық құқық бұзушылық картасын» жаңарту үшін елді мекендердің электрондық картасы әзірленді. Осы жұмыс аясында жылжымайтын мүлік нысандарының мекенжайлары түгенделді. Бұл деректер тұрақты түрде Қазақстан Республикасы Бас прокуратурасының Құқықтық статистика және арнайы есепке алу комитетіне беріледі.
Басқарма желтоқсан-қаңтар айларында «Құрылыс және реконструкциялау жобаларын әзірлеу кезінде бастапқы материалдарды ұсыну» және «Эскизді келісу» бағыттары бойынша жалпы 6858 мемлекеттік қызмет көрсеткен.
Жетісу облысының Сәулет және қала құрылысы басқармасы алдағы уақытта да өңірдің сәулеттік дамуын қамтамасыз ету және халыққа сапалы мемлекеттік қызмет көрсету жұмыстарын жалғастырмақ.