Алматы облысында Ұлыстың ұлы күні – Наурыз мейрамына орай кең ауқымды мерекелік шаралар өтеді. Қонақтар үшін театрландырылған қойылымдар, ұлттық ойындар, концерттер мен ерекше мәдени перформанстар ұйымдастырылады.
Облыс әкімінің бірінші орынбасары Нұрлан Әбдірахым Наурыздың мәні мен маңызы туралы:
“Наурыз – бұл тек халықтық мереке ғана емес, бұл – жаңару мен бірліктің, ұрпақтар сабақтастығының символы. Біз бұл мейрамды өңір тұрғындары мен қонақтары үшін ерекше әрі есте қаларлықтай етуге бар күшімізді саламыз”, — деп атап өтті.
Биыл Наурыз мерекесі он күнге созылатын ерекше марафон форматында өтеді. Әр күннің өзіндік тақырыбы мен мазмұны бар.
Жалпы өңірде 368 мерекелік іс-шара жоспарланған, олар барлық аудандарда өтеді.
Мерекенің негізгі тойланатын үш басты орны анықталды:
Орталық алаң – мұнда 25 қазақы киіз үй тігіліп, қонақтар ұлттық салт-дәстүрлермен таныса алады. Келушілерге қазақтың дәстүрлі тағамдары ұсынылып, ал басты сахнада Қазақстан эстрада жұлдыздарының концерті өтеді.
Қонаев көшесі – бұл алаңда қолөнер шеберлерінің шеберлік сабақтары, ұлттық тағамдар жәрмеңкесі мен қолданбалы өнер көрмесі ұйымдастырылады.
Б. Соқпақбаев атындағы қалалық парк – мұнда қазақша күрес, асық ату, гір тасын көтеру сияқты ұлттық ойындар өтеді. Сондай-ақ, қонақтар үшін арнайы фотозоналар, аниматорлар мен балаларға арналған ойын-сауық бағдарламасы әзірленген.
2025 жылғы Наурыздың басты оқиғалары:
Қыдыр ата бейнесіндегі театрландырылған көрініс, тазарту рәсімдері және дәстүрлі наурызкөже тарату.
100 домбырашы қазақ күй өнерінің майталманы Нұрғиса Тілендиевтің 100 жылдығына арнап күй орындайды.
Қазақстандық эстрада жұлдыздарының концерті және жастарға арналған Open Air ашық аспан астындағы мерекелік шара.
