ҚР Ішкі істер министрлігі 2025 жылды құқық бұзушылықтың алдын алу жылы деп жариялады. Бұл бастама қоғамдағы қылмыс деңгейін төмендету және азаматтардың қауіпсіздігін қамтамасыз ету мақсатында қолға алынды. Осы тұста облыста атқарылып жатқан жұмыстар туралы полиция полковнигі Қайсар Мұхметов ақпаратпен бөлісті.
Жетісу облысында жыл басынан бері 47 мыңнан астам әкімшілік құқық бұзушылық тіркелген. Олардың басым бөлігі – жол қозғалысы ережелерін бұзу. Атап айтсақ, 1600-ден астамы жылдамдықты асыру, 2900-ге жуығы көлік құралдарын пайдалану қағидаларын бұзу, 1300-ден астамы жүргізушілердің көлік басқару кезінде телефон қолдануы, 3700-ге жуығы жаяу жүргіншілердің жол ережелерін сақтамауынан болған жағдайлар.
Сонымен қатар, 142 жүргізуші көлікті мас күйінде басқарғаны үшін әкімшілік жауапкершілікке тартылған.
Жол-көлік оқиғаларының алдын алу – басым бағыттардың бірі. Жыл басынан бері 29 адам жол апатынан қаза тауып, 314 азамат түрлі жарақат алған.
Жыл басынан бері 763 құқық бұзушыға қорғау нұсқамасы қойылды, 128 адамға ерекше талап орнатылды. 86 азаматқа алкогольдік ішімдікті тұтынуға тыйым салынды.
Полиция қызметкерлері құқық бұзушылықтың алдын алу шараларын күшейтіп, қоғаммен бірлескен жұмыстарды жалғастыруда. Олардың пікірінше, азаматтардың құқықтық сауаттылығын арттыру арқылы ғана қылмыс деңгейін төмендетуге болады.