Биыл Жетісу облысында қант қызылшасының егіс алаңы 12,2 мың гектарды алып отыр. Екі қант зауытының өндірістік қуаттылығына байланысты егіс көлемі 1,5 мың гектарға қысқартылмақ. Осы көлемде егілген дақылдан шамамен 550 мың тонна тәтті түбір жинау жоспарлануда.
Жетісу облысы Ауыл шаруашылығы басқармасы басшысының орынбасары Бахтияр Шампиковтің айтуынша, алдағы екі жыл ішінде Текелі қаласында жаңа қант зауытын салу жоспарланған. Бұл тәтті түбірдің егіс көлемін ұлғайтып, аймақтағы қант өндірісін арттыруға мүмкіндік бермек.
Қазіргі уақытта ауыл шаруашылығы тауар өндірушілері егістік алқаптардың өнімділігін арттыру және топырақтағы ылғалды сақтау мақсатында агротехникалық шараларды жүзеге асыруда.
Көктемгі егіс жұмыстарының үздіксіз жүргізілуін қамтамасыз ету үшін фермерлерді ресурстық қамтамасыз ету бойынша шаралар көзделген. Атап айтқанда, 5,5 мың тонна арзандатылған дизель отыны бөлінді, ал қажетті минералды тыңайтқыштардың көлемі 58,8 мың тоннаға дейін ұлғайтылды. Сондай-ақ, ауыл шаруашылығы техникасын жөндеу және алдын алу жұмыстарының толық кешені жүргізілді.
Қазіргі уақытта Жетісу облысында көктемгі егіс жұмыстары бекітілген жоспарға сәйкес жүргізілуде. Бұл шаруаларға егістік науқанын толық көлемде жүзеге асыруға ықпал етеді.
