Білім беру мекемелеріндегі балалардың қауіпсіздігін қамтамасыз ету – өзекті мәселе. Алматы облысының білім басқармасы бұл бағытта маңызды шараларды қолға алуда.
Облыстық тәрбие жұмысы, қорғаншылық, қамқоршылық және арнайы білім беру бөлімінің басшысы Айжан Қәрібайқызының мәліметінше, 2024 жылдың қаңтар-маусым айлары аралығында 286 жол-көлік оқиғасы тіркеліп, 335 бала жарақаттанған. Бұл балалардың қауіпсіздігін қамтамасыз ету қажеттілігінің маңыздылығын көрсетеді.
Мектептерде жол қауіпсіздігін күшейту мақсатында 432 білім беру мекемесіне жасанды жолдағы соққылар, жаяу жүргіншілер өткелдері, бейнебақылау камералары және жарықтандыру құрылғылары орнатылған. Атап айтқанда, 428 жаяу жүргіншілер өткелі белгісі, 253 бейнебақылау камерасы және 36 қиылыста жарықтандыру құрылғылары қойылған.
Айжан Қәрібайқызының айтуынша, оқушылармен «Жол қозғалысы ережелерін сақтайық!» атты сынып сағаттары тұрақты түрде өткізіліп, әр мектепте «Полицияның жас көмекшілері» атты топтар жұмыс істейді. Олар жолдағы балалардың қауіпсіздігіне байланысты түсіндірме жұмыстарын жүргізуде.
«Жыл басынан бері 48 мектептің бейнебақылау камералары жаңартылды. Қазіргі таңда облыстағы барлық білім беру мекемелері 100% бейнебақылау жүйелерімен қамтылған. Сонымен қатар, 157 мектепке арнайы күзет қызметін орнату жоспарланып отыр», – деді Айжан Қәрібайқызы.
Балалардың қауіпсіздігін сақтау мақсатында патрульдік полиция тобы мен ювеналды полиция қызметкерлері білім басқармасымен тұрақты түрде бірлескен жұмыс жүргізуде. Сонымен қатар, білім беру мекемелерінің барлығы дабыл түймелерімен жабдықталып, терроризмге қарсы қорғау шаралары қолға алынған, – деп қорытындылады спикер.