Балқаш ауданында сыбайлас жемқорлықтың алдын алу, құқықтық мәдениетті қалыптастыру және қоғамда адалдық қағидаттарын нығайтуға бағытталған бірқатар ауқымды іс-шаралар ұйымдастырылды. Бұл жұмыстар «Балқаш аудандық ішкі саясат бөлімі» мемлекеттік мекемесінің тапсырысымен, Қазақстан Республикасы Сыбайлас жемқорлыққа қарсы іс-қимыл агенттігінің Алматы облысы бойынша департаментінің қолдауымен және «PARYZ еріктілері» жастар қоғамдық бірлестігінің ұйымдастыруымен жүзеге асырылды.
Әлеуметтік тапсырыс аясында аудан тұрғындары арасында құқықтық мәдениетті дамытуға бағытталған 10 кездесу өткізілді. Жиындарға Сыбайлас жемқорлыққа қарсы іс-қимыл агенттігінің Алматы облысы бойынша департаменті басшысының бірінші орынбасары Мамыт Айдос пен Балқаш ауданының әкімі Азат Құтпанбетов қатысты. Олар мемлекеттік қызметкерлермен, медицина, білім беру және полиция саласының мамандарымен, сондай-ақ аудан тұрғындарымен кездесіп, жемқорлықтың алдын алу шараларын талқылады.
Аудан жастары арасында «Адал азамат. Ол кім?» тақырыбында дебат ойыны ұйымдастырылды. Ойынға 10 команда қатысып, әділдік пен адалдық жайында өз пікірлерін ортаға салды. Жарыс нәтижесінде бірінші орынды «Ақкөл орта мектебі МДШО» құрамасының «Парасат» командасы жеңіп алды. Екінші орын «Барибаев орта мектебінің» «Жалын» командасына берілді. Ал үшінші орын «Көкжиде орта мектебінің» «Білім шыңындағы» командасына бұйырды.
Сонымен қатар, «Сыбайлас жемқорлықсыз әлем» тақырыбында сурет байқауы және «Әділетті Қазақстан — Адал азамат» эссе жазу байқауының жеңімпаздары да марапатталды. Эссе байқауында Шырын Қуанқызы бірінші орынды иеленсе, Жандәулет Ахат екінші орынға, ал Төлеген Сейтқали үшінші орынға лайық деп танылды. Сурет байқауында Айкөркем Ернатқызы бірінші орынды жеңіп алса, Томирис Нүкүбай мен Мирас Тілеулес екінші және үшінші орындарға ие болды.
«PARYZ еріктілері» жастар қоғамдық бірлестігінің төрағасы Әділет Айтқазы бұл шаралардың жастар үшін қаншалықты маңызды екенін атап өтті.
«Біз жастардың бойында құқықтық мәдениетті қалыптастыруды және олардың сыбайлас жемқорлықсыз қоғам құруға деген сенімін нығайтуды мақсат еттік. Бұл жобаның аясында 1000-нан астам ақпараттық материал таратылып, 18 тақырыптық баннер орнатылды. Сондай-ақ, әлеуметтік желілерде сыбайлас жемқорлыққа қарсы 4 бейнеролик кеңінен таратылды. Мұның бәрі жастарға адалдық пен әділдік қағидаларын түсінікті түрде жеткізуге бағытталды».
Сонымен қатар, Әділет Айтқазы жастардың белсенділігіне ерекше тоқталды.
«Дебаттар мен шығармашылық байқаулар тек жарыс емес, жастардың өз идеяларын ашық жеткізуіне мүмкіндік беретін алаң болды. Байқаулар барысында қатысушылар өздерінің сыни ойлау қабілеттерін шыңдап, қоғамдағы маңызды мәселелерді терең түсінуге тырысты. Жастардың эсселері мен суреттері олардың шығармашылық қана емес, азаматтық көзқарастарының да жоғары деңгейде екенін көрсетті».
Бұл бастамалар Балқаш ауданында құқықтық мәдениетті дамытуға, сыбайлас жемқорлыққа қарсы тәрбиені нығайтуға және жастардың азаматтық белсенділігін арттыруға үлкен үлес қосты.
