AMANAT партиясы Еңбекшіқазақ ауданындық филиалына қарасты «Рахат» бастауыш партия ұйымы қайырымдылық шарасын ұйымдастырып, Рахат ауылдық округінің Өрікті ауылында тұратын 9 отбасыға демеушілік көмек есебінен қысқы отын жеткізіп берді.
Бастауыш партия ұйымының төрағасы Дәурен Хасеновтің айтуынша, бұл бастама халықтың әлеуметтік осал топтарын қолдау мақсатында қолға алынған.
«AMANAT партиясы халықтың мұң-мұқтажын тыңдап, нақты көмек көрсетуге әрдайым дайын. Алда қыс қаһарына мінген кезде, отын тапшылығы кейбір отбасыларға қиындық тудыратыны белгілі. Сондықтан біз ауыл азаматтарымен бірлесіп, әлеуметтік жағдайы төмен отбасыларға көмір жеткізіп бердік. Бұл – біздің бірлік пен жанашырлықтың жарқын үлгісі», – деді ол.
Айта кетейік, «Рахат» бастауыш партия ұйымы бұған дейін де әлеуметтік бағыттағы түрлі қайырымдылық шараларын өткізіп, мұқтаж жандарға көмек қолын созып келеді. Ұйым мүшелері алдағы уақытта да тұрғындарды қолдау жұмыстарын жалғастыруды жоспарлап отыр.