Технология қарыштап дамып, цифрландыру дәуірі жүріп тұрғанымен адам еңбегін ешкім алмастырмақ емес. Қос қолдан шыққан әр бұйым қашанда құнды, әрі өміршең. Адамзат үшін асыл дүниені өндіруші техника емес. Сондықтан болса керек, жұмысшы мамандардың еңбегі еш кетпейді.
Әр үйдің сәнін кіргізіп, төрінде тұратын, қырмызы қыздардың еншісіне берілетін дүние бар. Ол-қыз жасауы. Қолдан құралған құрақтар көздің жауын алары сөзсіз. Оны да жасайтын –адам.
Мәселен, Қонаев қаласының тұрғыны Бибігүл Оспанова тігін цехында істейді. Ол осыдан 2 жыл бұрын «Күміс жас» жобасы арқылы жұмысқа тұрған. Қолөнерге деген қызығушылығын осылайша, табыс көзіне айналдырып отыр.
«Мансап орталығына өтінім берген едім. Мені, тігін цехына бағыттады. Зейнетке шығуыма да аз қалды. Оған дейін осы жерде еңбек етемін. Тапсырыс көлеміне қарай жұмыс жасаймын. Күніне кем дегенде 12 көрпе жасап шығамыз»,-дейді Бибігүл Оспанова.
Бибігүл ана, сапалы матадан сәні келіскен, ою-өрнегі қабысқан көрпе-жастықтың түрлі үлгілерін жасап шығарады. Он саусағынан өнер тамған кейіпкер, тігін машинасының құлағында ойнайды. Ол тек, табыс тауып қоймай, қазаққа ғана тән қолөнердің өрісін кеңге жаюына ықпал етіп отыр.
Жұмыстың жаманы жоқ, кез келген еңбек құнды. Прездент айтқандай, «өз кәсібін жетік меңгерген мамандар ұлт сапасын арттырады».
