Жаркент қаласында жүк-жолаушылар әуежайын салу жоспарлануда. Бұл туралы Өңірлік коммуникациялар қызметінің баспасөз конференциясында Жетісу облысының Жолаушылар көлігі және автомобиль жолдары басқармасының басшысы Ғалымжан Дәрібаев айтып берді.
Жетісу облысында жол инфрақұрылымын жақсарту бағытында ауқымды жұмыстар жүргізіліп жатыр. 2024 жылы жергілікті маңызы бар автомобиль жолдарын жөндеуге 41,2 млрд теңге бөлініп, оның 26,4 млрд теңгесі облыстық маңызы бар жолдарды жаңарту мен жөндеуге бағытталды.
Жыл қорытындысы бойынша 193,4 шақырым автожол жөнделіп, бірқатар маңызды инфрақұрылымдық жобалар жүзеге асырылды:
• 38 шақырым жол қайта жаңғыртылды;
• 3 көпірге күрделі жөндеу жүргізілді;
• 155,4 шақырым жолға орташа жөндеу жасалды.
Сонымен қатар, жолдардың ағымдағы жөндеуі мен күтіміне 2,2 млрд теңге бөлініп, жоспарлы жұмыстар атқарылды.
Жол қауіпсіздігін қамтамасыз ету мақсатында облыстық маңызы бар «Алматы – Өскемен – Қапал – Арасан» және «Талдықорған – Үштөбе» бағыттарына екі автоматтандырылған өлшеу станциясы (АСИ) орнатылды. Бұл жүйе ауыр жүк көліктерінің шамадан тыс салмақпен қозғалуын бақылауға мүмкіндік береді.
Келесі жылы облыстық маңызы бар 152 шақырым жол мен 53 елді мекеннің ішкі жолдарына жөндеу жұмыстарын жүргізу жоспарланып отыр. Бұл жұмыстардың нәтижесінде жергілікті маңызы бар автожолдардың жақсы және қанағаттанарлық жағдайдағы үлесі 95%-ға жетеді деп күтілуде.
Балқаш көлі мен «Бұрхан Бұлақ» сарқырамасына апаратын жолдарды жаңғырту жұмыстары басталды. Бұл туристік бағыттардағы жол сапасын арттырып, өңірдің туристік әлеуетін дамытуға серпін береді.
Қыс мезгілінде облыстық маңызы бар жолдарды күтіп ұстау үшін 264,9 млн теңге бөлінді. Қажетті 8 530 тонна тайғаққа қарсы материал дайындалып, 150 арнайы техника жұмылдырылды.
Облыс әкімдігі мердігер ұйымдардың жұмыс сапасына талапты күшейтті. Жол жұмыстары 5 сатылы бақылау жүйесі арқылы тексеріледі. Оның ішінде техникалық қадағалау мен «Жол активтерінің ұлттық сапа орталығы» мамандарының бақылауы қарастырылған.
Жетісу облысы жол инфрақұрылымын дамыту бағытындағы жұмыстарды әрі қарай да тұрақты бақылауда ұстамақ.
Жетісу облысында жүк жолаушылар әуежайын салу жоспарлануда
