Наурыз айының 27 мен 29 аралығында Жетісу облысының Полиция департаменті жеке сот орындаушылармен бірлесіп, «Борышкер-2024» жедел-профилактикалық іс-шарасын өткізуде. Рейд барысында көлік салығы мен алимент төлеуден жалтарып жүрген азаматтарға шара қолданылады. Осындай ақпаратпен Б.Құранбек атындағы журналистер үйінде БАҚ өкілдерімен кездесуде Әкімшілік полиция басқармасының бөлім бастығы Саят Ибраимов бөлісті.
«Жыл басынан бастап бүгінгі күнге дейін 20 мыңнан астам хаттама борышкерлерге мәжбүрлі түрде жолданды. Оның барлығына жеке сот орындаушылармен атқарушылық өндіріс қозғалды. Сондай-ақ, жыл басынан «Борышкер» іс-шарасы щеңберінде айыппұлдары бар 27 автокөлік арнайы тұраққа қойылды», — деді полиция майоры.
Акцияның басты мақсаты — жазадан құтылмаушылық қағидатын сақтау, айыппұлдар мен алиментті төлеуден жалтарып жүрген борышкерлерді анықтап, әкімшілік айыппұлдарды уақтылы өтеу қажеттілігі туралы халықты хабардар ету.
Іс-шараға Полиция және Әділет, Мемлекеттік Кірістер департаментінің қызметкерлері және жеке сот орындаушылар мен олардың көмекшілері атсалысуда.