Құрметті достар!
Мемлекет басшысы Қасым-Жомарт Кемелұлы Тоқаевтың төрағалығымен Атырау қаласында Ұлттық құрылтайдың үшінші отырысы өтті.
Ұлттық Құрылтай – ұлт болашағына қатысты маңызды мәселелерді талқылап, шешім іздейтін бірегей алаң. Бүгінгі Құрылтайда да ел болашағына қатысты өзекті мәселелер айтылды.
Ел Президенті Қасым-Жомарт Тоқаев Құрылтай отырысында еліміздің идеологиялық, рухани бағыт-бағдарын айқындап, жалпыұлттық құндылықтар төңірегінде өз ойын айтты. Әрине, тіл, дін, тарих пен мәдениет, салт-дәстүр – әр ұлттың басты байлығы. Президент болашаққа сеніммен қадам басу үшін төл тарихымыздың ауқымы кең екенін толық сезініп, мәдени мұрамызды сақтап, оны дәріптеуіміз қажет екенін атап өтті.
Біздің өткеніміз — болашақ ұрпаққа үлгі, өнеге болуы тиіс деп ойлаймын. Ата — бабаларымыздың бізге қалдырған мұраларын қастерлер, сақтау әрі дәріптеу әрбір Қазақстандықтың қасиетті де қастерлі борышы.
Қазіргі таңда белең алып жатқан есірткі саудасы, жастар арасында «вейптердің» таралуы, лудомания, тұрмыстық зорлық-зомбылық, буллинг пен агрессия, вандализм қоғамның дертіне айналғандай.
Бұл дертпен күрес үшін жұмыс басталу үстінде. Қазір Парламентте вейптерді елге әкелген, оны өндірген және таратқан адамдарды қылмыстық жауапкершілікке тартуды көздейтін заң жобасы қаралып жатыр. Нашақорлыққа және есірткі бизнесіне қарсы күресу үшін кешенді жоспар қабылданды.
Өскелең ұрпақты барынша мәдениетті және мемлекет үшін аянбай еңбек етіп тәрбиелеуге үйретудің кілті — тәрбиеде деп ойлаймын. Ол үшін өскелең ұрпақтың бойына адами құндылықтар мен қасиеттерді сіңіруіміз қажет. Тәуелсіздік және отаншылдық, бірлік және ынтымақ, әділдік және жауапкершілік, еңбекқорлық және кәсіби біліктілік, жасампаздық және жаңашылдық — міне, әр қазақстандықтық бойынан табылу керек құндылық.
Ел ертеңі сіз бен біздің қолымызда. Ендеше мемлекетіміздің болашағы жарқын, еліміз аман болсын.
Мықты ұлт, іргелі мемлекет құруға барлығымыз бір кісідей күш салайық!
Алия Ақжолтайқызы Алматы облыстық мәслихат депутаты