1 қаңтардан бастап арнаулы кәсіптік мемлекеттік жәрдемақыны тағайындау, жүзеге асыру, тоқтата тұру, қайта бастау және төлеуді тоқтату қағидалары күшіне енді. Оны алуға кімдер сенім білдіре алады? Бұл туралы Жетісу облысының Өңірлік коммуниациялар ақпараттық алаңында Еңбек және әлеуметтік қорғау комитетінің Жетісу облысы бойынша департаменті басшысының орынбасары Ерлан Абдалиев пен зейнетақы және әлеуметтік қамсыздандыру бөлімінің басшысы Мәулен Сүлеймен айтып берді.
Спикерлердің айтуынша, аталған қағидаға байланысты жас шектеуі бар. Мәселен, 55 жасқа толған ел азаматтары жәрдемақы алуға сенім білдіре алады. Олар осы жасқа толғанға дейін еңбек жағдайлары зиянды жұмыстарда кемінде 7 жыл жұмыс істеген (кәсіптер уәкілетті мемлекеттік орган бекіткен өндірістердің, жұмыстардың, жұмысшылар кәсіптерінің тізбесінде көзделген). Қазіргі уақытта 491 мың қазақстандық зиянды еңбек жағдайында жұмыс істейді.
«Зиянды еңбек жағдайларында жұмыс істейтін азаматтарымыздың өмірі мен денсаулығы үшін ортақ жауапкершілікті атап өту маңызды. Бұл мемлекет, жұмыс беруші, өмірді сақтандыру компаниялары және жұмысшылардың өздері. Сондықтан төлемдердің 4 көзін анықтау ұсынылады. Біріншіден, мемлекет тарапынан оның көзі республикалық бюджет есебінен айқындалады. Екіншіден, сақтандыру компанияларының төлемдері. Төлем сомасын ең төменгі күнкөріс деңгейінің 2 деңгейінде, яғни, 86 мың теңгеден сәл артық мөлшерде анықтау ұсынылып отыр. Бұл сома жыл сайын ең төменгі күнкөріс деңгейінің өсуімен индекстелетін болады. Әлі де зиянды еңбек жағдайларында жұмыс істейтіндер сақтандыру компаниясымен зейнетақы аннуитеті шартын жасасу арқылы 50 жастан бастап өздерінің зейнетақы жинақтарын пайдалана алады. Мұны 4,4 мың адам пайдаланды», — деп түсіндірді департаменті басшысының орынбасары.
Жәрдемақы тағайындау үшін Мемлекеттік корпорация арқылы яғни жергілікті жерлердегі Халыққа қызмет көрсету орталығына өтініш беру арқылы жүгінуге болады.
-