Мемлекет Басшысының тапсырмасына сәйкес, Ішкі істер министрлігі басқа мемлекеттік органдармен өзара іс-қимыл жасай отырып, биылғы жылдың 23-ші қаңтарынан бастап, 2023 жылдың 1-ші қыркүйегіне дейін елге әкелінген шетелдік автокөліктерді заңдастыруды жүргізуде. Заңдастыру басталған кезден Жетісу облысы аумағында Е-gov порталы арқылы 3179 өтініш түсіп, 2024 өтінімге оңтайлы шешім қабылданды. Бұл жайлы Жетісу облысы Полиция Департаменті бастығының бірінші орынбасары Жасұлан Құдайбергенұлы Байкенов, Жетісу облысы ПД Әкімшілік полиция басқармасы процессингалық орталығының бастығы Әділет Қайнарбекұлы Темірқұлов пен Жетісу облысы ПД жол және техникалық инспекциясының аға инспекторы Диас Талғатұлы Молдабергенов мәлімдеді.
Облыстағы электрондық өтінімдер бойынша рұқсат берілген темір тұлпардың 2 мыңға жуығы агрегаттық тексеру және салыстырудан өтіп, оның 1974 тіркелген.
«Өңірімізде шет елдік көлік құралының 427 уақытша тіркеуде. Атап айтсақ, Армения – 46, Ресей – 423, Қырғызстан – 507, Беларусь – 1, Грузия – 1, Корея — 1, Дубай – 3, Моңғолия – 1, Америка – 1, сондай-ақ, пайдалану құқығына берілген сары Қазақстандық нөмірлері – 37 автокөлік тіркеуге қойылды. Сонымен қатар осы жылдың мамыр айының 22-ші жұлдызынан бастап 486 жуық автоконструктор автокөліктерін заңдастыру жүзеге асуда», — деді өз сөзінде Жасұлан Байкенов.
Айта кетейік, 2023 жылдың 17-ші шілдесінен бастап, Еуразиялық экономикалық одақ елдерінде бұрын тіркелген жері бойынша есептен шығарылмаған және шектеулері бар автокөліктерді Қазақстан Республикасында 5 жылдық мерзімге уақытша тіркеуге қоюға мүмкіндік берілді.
«Талдықорған қаласында орналасқан Мемлекеттік халыққа қызмет көрсету орталығына 498 азамат Еуразиялық экономикалық одақ елдерінен әкелінген көлік құралдарын уақытша тіркеу бойынша жүгініп, оның 427 көлік құралы тіркелді. Яғни, Армения Республикасынан – 88, Қырғызстан Республикасынан – 183 және Ресей Федерациясынан — 156», — дейді Әділет Темірқұлов.
Ал осы жылдың 1 шілдесіне дейін өтініш берген барлық Қазақстан азаматтарына көрсетілген мерзімнен кейін автокөліктерді заңдастыру құқығы берілді. Диас Молдабергенов бір реттік заңдастыруды ескере отырып, автокөлік иелеріне 2023 жылдың 1-ші шілдесіне дейін заңдастыруға берілген өтінімдер биылғы жылдың 31 желтоқсанына дейін ғана қаралатынын хабарлады.
-