Жетісу облысында қызылшамен ауырған тұрғындардың 85 пайызы екпе алмаған

Облыста бұл дертке қатысты тұрақсыз жағдайға қарамастан, екпеден бас тартушылардың саны жыл санап артып келеді. 2020 жылы 285 тұрғын ауруға қарсы екпе салдырмаса, биыл 10 айда бұл көрсеткіш 496-ға жеткен.
Жетісу өңірінде жыл басынан бері қызылшамен ауырған 282 жағдай расталды. Арасындағы 239 адам екпе алмаған. Статистика бойынша бұндай сырқатпен ауырған науқастардың көбі 4 жасқа дейінгі балалар. Осыған орай Өңірлік коммуникациялар қызметі алаңына Жетісу облыстық санитариялық-эпидемиологиялық бақылау департаменті басшысының орынбасары Индира Күнбасова мен Жетісу облысының штаттан тыс эпидемиологы Рандир Сахариев келді. Спикерлер екпенің маңыздылығына тоқталды.
«Халықтың екпеден бас тартуының басты себебі – интернет ресурстары мен әлеуметтік желілерден алынған ақпаратқа негізделген жеке сенімдері. Өздеріңіз білетіндей, мұндай материалдар мүлдем расталмаған. Адамдар бұл деректерге көзсіз сеніп нәтижесінде вакцина алудан үзілді-кесілді бас тартады. Сондықтан қызылша ауруына шалдыққандар саны артып келеді», – дейді Жетісу облыстық санитарлық-эпидемиологиялық бақылау департаменті басшысының орынбасары.
Спикерлер кез келген аурудың ең жақсы емі алдын алу екенін айтып, облыс тұрғындарын екпе алуға шақырды.