Биыл мұсылмандар үшін қасиетті ораза 11 наурызда басталады. Сәуір айының 5-нен 6-на қараған түн – қасиетті Қадір түні. Отыз күндік ораза сәуірдің 9-ы аяқталып, 10 сәуір – айт мерекесін тойлау басталады. Пітір садақасы еліміз бойынша екі келі ұнның орташа бағасы негізінде жан басына 640 теңге. Рамазан айы туралы ақпаратпен Қазақстан мұсылмандары діни басқармасының Жетісу облысы бойынша бас имамы Керімбек Дәуітов пен Қазақстан мұсылмандары діни басқармасының Жетісу облыстық «Иман» мешітінің наиб имамы Нұрлан Усманов Б.Құранбек атындағы Журналистер үйінде өткен БАҚ өкілдерімен кездесуде айтып берді.
«Рамазан айында ораза ұстай алмайтын кісілер болады. Жүкті әйелдер, емізік баласы бар немесе ауырып жүрген, денсаулығы көтермейтін кісілерге Рамазан айында ораза ұстамауға рұқсат. Бірақ оларға хидия садақасын төлеу міндеттеледі. Ол дегеніміз бір күндік міскінді тойдыру. Хидияның көлемі жан басына 3400 теңге, шамасы келсе күнделікті мұқтаждарға беру арқылы амалы мойнынан түседі. Ал оған шамасы келмейтін жандар пітір садақаның мөлшерімен есептеп беруге болады», — деді Керімбек Сәрсембайұлы.
Дін қызметкерлері жылдағы дәстүр бойынша қайырымдылық іс-шараларын ұйымдастырады. Сондай-ақ, биылғы жылы да дәстүрлі исламға басымдық беріледі. Осы жылды муфтият «Ислам және дәстүр құндылығы жылы» деп жариялаған. Айта кетейік, ҚМДБ «Зекет және қайырымдылық» қорының бастамасымен «30 күнде 30 баспана» республикалық акциясы да биыл өз жалғасын таппақ.
«Пітір садақасы еліміз бойынша екі келі ұнның орташа бағасы негізінде жан басына 640 теңге. Айта кетейік, пітір садақа көлемі екі келі ұн немесе мейіз, бұдан бөлек 4 келі құрманың бағасымен де есептеле береді. Рамазан айы кіргеннен бастап Ораза айт намазына дейінгі уақыт аралығында мұсылман қауым өзі және отбасы үшін осындай зекет беруі уәжіп», — деді Нұрлан Жұманұлы.
-