Жоба аясында өңірде жалпы 9 мыңға жуық азамат қаржылық сауатын арттырды. Бүгін Қонаев қаласындағы 32363 әскери бөлімінде «Қарызсыз қоғам» жобасы аясында қаржылық сауаттылықты оқыту бойынша ауқымды жоба жалғасты.
«Бүгін аманаттықтар қаржылық сауаттылық бойынша әскери қызметшілерге сабақ өткізуде. Осы жобаға қатыса отырып, қаражатты тиімді жұмсауды, артық шығындарға ұрынбауды, сонымен қатар белгілі бір деңгейде отбасылық кіріске жоспар жасап, оны жоспарлы түрде жұмсау секілді дүниелерді үйрендік. Әскери бөлімнің атынан рахметімізді айтамын», – дейді гвардия аға лейтенанты Шешхан Оразай.
Айта кету керек, қазір миллионнан астам қазақстандық несиесін төлей алмай жүр. Мемлекет басшысы тұрғындардың кредитті шамадан тыс алуы қатты алаңдататынын айтып, азаматтарды жаппай қаржылық сауаттылыққа оқытудың ауқымын кеңейтуді тапсырған еді.
Осыған байланысты жыл басында «AMANAT» партиясы Halyk Bank-пен бірлесіп, «Қарызсыз қоғам» жобасын іске қосқан болатын.