Бүгінгі таңда тұмауға қарсы вакцинациямен 156 мыңға жуық адам, яғни, егілуге жататындардың 92% қамтылды.
Атап айтсақ, медициналық қызметкерлердің 91%-ы, 2-3 триместрдегі жүкті әйелдердің 90%-ы, жабық мекемелердегі балалардың 69% -ы, диспансерлік есепте тұрған адамдардың 84%-ы және қарттар үйінің контингенті 100% тұмауға қарсы егілді.
Облыста тұмауға қарсы вакцинация 7 ауданда аяқталды. Олар Балқаш, Еңбекшіқазақ, Жамбыл, Іле, Кеген, Райымбек, Ұйғыр аудандарында және Қонаев қаласында жүргізілді. Қазірде аймаққа қарасты 2 ауданда екпе салу жұмыстары жүргізіліп жатыр.
Инфекциялық сырқаттанушылықтың маусымдық кезеңінде Алматы облысының СЭБД өзін және жақындарын қорғау үшін, тұмауға қарсы егілуге шақырады.
Айта кету керек, денсаулық сақтау басқармасымен «Гриппол плюс» вакцинасының 168 500 дозасы сатып алынған. Соңғы 11 жылда халықты тұмауға қарсы вакцинациямен қамту 6,4%-дан 13,9%-ға дейін өсті.