Кеген ауданы әкімі Нұрбақыт Теңізбаевтың айтуынша, биыл көктемде жөндеуден өткен Көкпек, Кеген, Нарынқол ауылдарында жасалған жолдың сапасы сыр берген. Онымен қоса, Кеген – Түп тасжолы мен Көлсай жолдары да шұрық тесікке айналған.
«Кеген ауданында «ҚазАвтоЖол»-ға қарасты көптеген жолдарды жөндеу қажет. Өйткені, ауданымызға келіп жатқан туристердің саны былтырғы жылға қарағанда үш есе көбейді. Алдағы уақытта Президент тапсырмасына сай Нарынқолдан шекара ашылса, Кеген –Түп тасжолы арқылы жүретін жүргіншілер де көбеймек. Бірақ жол сапасы өте нашар. Сондықтан құр сөз бен бос уәде бермей, ҚазАвтоЖол мәселені жедел қолға алу керек деп санаймын», – дейді Кеген ауданынының әкімі Нұрбақыт Теңізбаев.
Ал «ҚазАвтоЖол»-дың Алматы облыстық филиал директорының орынбасары Нұржан Таңатаровтың айтуынша, биыл компаниясына 32 миллиард теңге қаржы бөлінді. Аясында 12 жоба жүзеге аспақ. Ішінде Кеген өңірі де бар деп отыр.
«Кеген, Нарынқол бойынша 15 шақырым жол салу жұмысы басталып жатыр. Тағы 74 шақырымды биыл қолға аламыз. Келесі жылы бітеді. Сондай-ақ Кеген – Түп тасжолы Қазақстанның Даму банкінен ақша бөлініп қолға алынады. Көлсай көлдері жаққа да 3-24 шақырымға дейін орташа жөндеу жүреді», – дейді Нұржан Таңатаров.
Сонымен қатар, жиында партиялықтар облыстық маңызы бар тас жолдардың да жай күйін сөз етті.
Алматы облыстық жолаушылар көлігі және автомобиль жолдары басқармасының басшысы Ермек Баймұқамбетов биыл өңірде 154 км жол жөнделетінін айтты. Оған 17 миллиард теңгеден аса қаржы бөлінген.
«Жалпы орташа жөндеу бойынша 10 жоба, тағы үш жоба күрделі жөндеу бойынша қолға алып жатырмыз. Бүгінде Ұйғыр, Райымбек, Кеген, Еңбекшіқазақ Талғар аудандарында орташа жөндеу жұмыстары басталып жатыр. Онда да жергілікті халықпен ақылдасып жұмыс жүрігізудеміз», – деді басқарма басшысы Ермек Баймұқамбетов.
Айта кету керек, отырыста «AMANAT» партиясының филиалы мен «Өңірлік даму» кеңесі көтерілген мәселелер бойынша жауапты тұлғаларға өз ескертпелерін айтты. Сонымен қатар бөлінген қаржының қалай игерілгенін партиялық бақылауда ұстап отыратындарын жеткізді.
