Өңірде небәрі бір жарым айдың ішінде табиғатты қорғау туралы заңнама 351-рет бұзылған. Нәтижесінде 5 қылмыстық іс қозғалып, 346 азамат әкімшілік жауапкершілікке тартылды. Осы жайында Бейсен Құранбек атындағы журналистер үйіне Жетісу облысы полиция департаментінің табиғатты қорғау полициясының бастығы, полиция майоры Бағлан Рымжанов келіп мәлімдеді.
Мәселен, спикердің айтуынша, 1-29 ақпан аралығында Қазақстан Республикасы Ішкі істер министрлігінің тапсырмасына сәйкес экологиялық қылмыстарды ашу мақсатында «Браконьер» республикалық жедел-профилактикалық жұмыстары өткізілуде. Іс-шара аясында аталған заңнамаға қарсы 175 факт анықталып, олар бойынша 2 қылмыстық іс қозғалды.
«Жұмыс барысында 142 килограмм балық, 6 дана мүйіз (киік мүйізіне ұқсас), 400 метр моножіп анықталып, 9 құрал тәркіленді. 173 азаматқа 912 560 теңге айыппұл салынып, әкімшілік жауапкершілікке тартылды», — деді Бағлан Рымжанов.
Бұл бағыттағы жұмыстар бақылауда және жалғасын табады, деп сендірді спикер.
