«КТК ойындарын ұйымдастыру және өткізу» басым бағыты бойынша Жетісу облысында «Жетісу Жайдарман» шығармашыл жастар қозғалысы жобасы жүзеге асырылды. Оған Жетісу облысы Қоғамдық даму басқармасы қолдау көрсетіп, «Жас Ұрпақ» жастар қоғамдық бірлестігі ұйымдастырды. Жетісу облысы әкімінің кубогы үшін ұйымдастырылған республикалық ойын туралы «Жас Ұрпақ» жастар қоғамдық бірлестігінің жоба үйлестірушісі Дархан Асқанбаев айтып берді.
Спикердің айтуынша, Жайдарман ойынына республика бойынша барлық өңірлерден жалпы саны 10 команда қатысты. Атап айтсақ, Шымкент қаласынан «Абырой», Алматы қаласынан «Эверест», «Алатау су», «Қабырғалар», «Энерго» командалары, Түркістан облысынан «Созақбай», Семей қаласынан «Шатыр», «Қыздар ЕМЕС» және Талдықорғаннан «Шапалақ», Ескелді ауданынан «Нар тәуекел» командалары қатысты.
«Жетісу облысы әкімінің кубогы үшін «Жайдарлы Жетісу» КТК республикалық фестивалі жоғары деңгейде өтті. Төрешілердің шешіміне сәйкес, 1 орынды Семей қаласынан «Шатыр» құрамасы алды. Жеңімпаздар әкім кубогы мен 500000 теңге көлемінде ақшалай сыйақы алды. 2 орын Талдықорғаннан 400000 теңге ұтып алған «Шапалақ» командасына бұйырды. Ал 3 орын және 300000 теңге Түркістан облысынан «Созақбай» командасына берілді. Сондай-ақ, жүлделі орын алмаған әр командаға 100 000 теңгеден ынталандыру сыйлықтары берілді», — деді спикер.