Жыл басынан бері Жетісу облысында 470 кене шағу тіркелді. Оның ішінде 230 жағдай 14 жасқа дейінгі балалар арасында орын алды. Кене энцефалитінің эндемиялық аймағына Ақсу, Алакөл, Ескелді, Кербұлақ, Сарқан аудандары мен Талдықорған, Текелі қалалары жатады.
Табиғи ошақтардың аумақтарында профилактикалық мақсатта кенелерге қарсы өңдеу жұмысының 1-туры сәуір айында 230га жүргізілді. 2-туры маусым айынан бастап, Ақсу, Алакөл, Ескелді, Кербұлақ, Сарқан аудандары мен Талдықорған қаласында 164 га жүргізілді. Өңдеу жұмыстары ауа райының болжамына байланысты 21 маусымға дейін жалғасады.
Кене энцефалиті – флавивирус Flavivirus туыстастығының вирустарымен шақырылатын, бас миының және жұлынның зақымдалуымен өтетін, табиғи-ошақтық ауру. Вирус адамдарға, жабайы және үй жануарларына, соның ішінде сиыр мен ешкі сияқты жануарларға таралуы мүмкін. Вирусты жұқтырудың алдын алу үшін кене энцефалитіне қарсы егу ұсынылады.
«2023 жылы және осы жылдың бес айында облыста кене энцефалиті ауруының жағдайлары тіркелген жоқ. Дегенмен, масалардың шағуы арқылы басқа безгек сияқты инфекцияларды жұқтыру мүмкіндігі бар. Облыс бойынша Алакөл, Қаратал, Панфилов аудандары және Талдықорған қаласында 150 га көлемде анофелогенді су айдындары бар. Безгектің алдын алу мақсатында, безгек масаларына қарсы анофелогенді су айдындарында 3 турмен маусым, шілде, тамыз айларында 150 га көлемге өңдеу жұмыстары жүргізіледі. Бүгінгі күні Қаратал, Панфилов аудандары мен Талдықорған қаласында 96га өңдеу жұмыстары жүргізілді және жұмыс жалғасуда. Масалардың шағуынан қорғау үшін жәндіктерге қарсы құралдарды (аэрозольдер, жақпа) үнемі пайдалану ұсынылады», — деп бөлісті Жетісу облысының санитариялық-эпидемиологиялық бақылау департаментінің басшысы Асхат Чарапиев.
Жетісу облысында кене шағуының 470 жағдайы тіркелді
