Бұл ақпаратты Қарасай аудандық білім басқармасы растады. Анықталғандай, 18 қараша күні А. С. Пушкин атындағы орта мектепте аудандық орталық аурухананың жылжымалы медициналық көлігі келіп, 15 жастағы оқушыларды флюорографияға түсірген.
2024 жылдың 20 қарашасында мектептің медбикесіне аудандық ауруханадан фтизиатор маманы хабарласып, 9-сынып оқушысынан туберкулездің ашық формасы анықталғанын хабарлады. Аталған оқушы 19 қарашадан бастап сабаққа қатыспаған.
Мектепте санитарлық-эпидемиологиялық шаралар дереу қолға алынып, сыныпта тазалау жұмыстары жүргізілді. Жұқпалы ауру анықталған сынып оқшауланып, кабинетте 5% гипохлорид ерітіндісімен дезинфекция жасалды.
«Пән мұғалімдері мен кіші қызметкерлер арасында туберкулезге қатысты санитарлық-эпидемиологиялық түсіндіру жұмыстары жүргізілді. Жұқпалы ауру анықталған сынып оқушыларына оқшауланған режимде білім беру ұйымдастырылды. 22 қараша күні оқу аяқталғаннан кейін мектеп аумағында жалпы көлемі 4200 шаршы метр жерге «Дезинфекция» ЖК мекемесі дезинфекция жүргізді», — делінген ресми хабарламада.
Қазіргі уақытта мектеп аудандық санитарлық-эпидемиологиялық бақылау басқармасының қорытындысын күтуде. Соған сәйкес, қосымша шаралар қабылданады.
Мамандардың айтуынша, білім алушыларға әзірге қауіп жоқ.
