Бүгін, 23 тамызда, театр және кино актрисасы Гүлшат Тутова Іле ауданының Өтеген батыр ауылындағы №1062 сайлау учаскесіне келіп, Құрылтай депутаттарының сайлауына қатысты.
Өнер иесін таныған тұрғындар онымен жылы амандасып, естелік суретке түсті. Актриса дауыс бергеннен кейін жерлестерімен тілдесіп, ізгі тілектеріне алғыс айтты.
«Қарапайым кездесулер ерекше әсер қалдырады»
— Көрермендермен көбіне театрда, түсірілім алаңында немесе шығармашылық кездесулерде жүздесеміз. Ал бүгін мүлде басқа жағдайда кездесіп отырмыз. Танып, амандасып, жылы сөздерін айтып жатқан жерлестеріме рақмет. Осындай қарапайым кездесулердің өзі ерекше әсер қалдырады, — деді Гүлшат Тутова.
Гүлшат Тутова театр және кино саласында ұзақ жылдар еңбек етіп келеді. Оның мәдениет саласына қосқан үлесі мемлекеттік «Құрмет» орденімен бағаланған.
