Бүгін Қазақстан Республикасы Парламенті Мәжілісінің депутаты Рожин Максим Николаевич, Ұйғыр ауданына іс-сапармен келіп, аудандық партия филиалында қоғамдық қабылдау өткізді.
Жеке қабылдау барысында аудан тұрғындары тұрғын үй кезегі, жұмыссыздық, отбасылық жағдайлары мен әлеуметтік мәселелер және т.б. жәрдем түрлеріне қатысты сауалдарын қойып, жер мәселелері бойынша өз ұсыныс-тілектерін білдірді.
Қабылдауға алдын ала жазылған 7-ге жуық тұрғынның шағымдары толығымен тыңдалды және ұсыныстары да ортаға салынды. Көпшілігінің мәселелері ортақ, яғни үй кезегінің баяу жылжуына қатысты болды, сонымен қатар мәдениет қызметкерлеріндегі операторлардың және әкімшілікте істейтін жүргізушілердің, кіші қызметкерлердің жалақысын көтеру мәселесі, мемлекеттік тілдің құндылығы туралы сұрақтар көтерілді. Бұл мәселені назарға алған мәжіліс депутаты Шонжы ауылындағы салынып жатқан 60 пәтерлі үй жылдың соңына дейін аяқталатынын, содан соң тұрғын үйлер кезектілікке сай 60 отбасына берілетінін айтты.
Жалпы айтқанда, қабылдауға жазылған азаматтар тарапынан көптеген арыз-шағымдар да, өтініштер де, ұсыныстар да тыңдалды. Максим Николаевич барлығын сараптай, саралай келе, баршасына толықтай жауабын берді. Шешімі бар мәселелерге қатысты жауабын сол жерде берсе, кейбірін жауапты бөлім басшыларына табыстады.
