Шетелдегі демалыстың сәтті болуы үшін демалыс орнын таңдау барысында әрбір азамат таңдалған елдегі инфекциялық ахуалды ескеруі қажет.
Бүгінде дүниежүзі бойынша тырысқақтың (холера) ахуалы тұрақсыз. Дүниежүзілік денсаулық сақтау ұйымының 2024 жылдың карантиндік инфекциялармен сырқаттанушылық деректері бойынша әлемдегі 20 мемлекетте 81655 жағдай тіркеліп, оның 1576 жағдайы өліммен аяқталған. Азияның континенті бойынша 3 мемлекетте (Үндістан, Ауғанстан, Пәкістан) 11083 жағдай тіркеліп, оның ішінде 8 жағдай өліммен аяқталған.
Елімізден туристік сапармен баратындар санының өсуіне байланысты аурудың Қазақстанға әкелініп, таралу қауіпі жоғары. 2024 жылдың 5 сәуірінде «Дели-Алматы» рейсімен келген туристердің ішінен «тырысқақ» инфекциясы анықталып отыр.
Жалпы, тырысқақ – асқазан-ішек жолын зақымдайтын, құсу мен іш өту салдарынан ағзаның сусыздануына әкелетін аса қауіпті жедел ішек инфекциясы.
Тырысқақ ауруының қоздырғышы вибрион, суда көп уақыт сақталады, кептіруге, күн сәулесінің тікелей әсеріне, қайнатуға төзімсіз. Қоздырғыш су, тағам, тұрмыстық — қатынас жолдарымен жұғып, аш ішекте көбейіп, ауру тудырады. Жұқпаның көзі — науқас адам немесе қоздырғыштасымалдаушы.
Тырысқақ ауруының белгілері: жүрек айну, лоқсып құсу, іш өту (ауыр түрге айналса күніне 20 -30 ретке дейін), дәреттің түрі күріш қайнатпасына ұқсас болады. Осының нәтижесінде ағзадан су және микроэлементтер көп мөлшерде шығып, ауыр түрімен ауырған адамдар 20-30% дейін салмағын жоғалтады. Науқастың денсаулық жағдайы ағзаның сусыздануынан нашарлайды, суық тер басып, дене қызуы 34-35С дейін төмендейді, көзі шүңірейіп, терісі кеуіп тырысады, қан қысымы төмендейді, дауысы әзер шығады немесе мүлдем шықпай қалады (афония), егер адамды дер кезінде емдемесе, ол қайғылы жағдайға ұшырайды»,- деп атап өтті Жетісу облысының санитариялық-эпидемиологиялық бақылау департаменті басшысының орынбасары Индира Кунбасова.
Тырысқақ дертінің алдын-алу үшін келесі ережелерді сақтау қажет:
- жеке бас гигиена талаптарын қатаң сақтау;
- суды қайнатып қолдану;
- тамақтану алдында және әжетханадан кейін қолды сабынмен тазалап жуу;
- көкөніс пен жеміс — жидекті пайдаланарда сумен тазартып жуу;
- тез бұзылатын тағамдарды белгіленген температурада тоңазытқышта сақтап, оларды жарамдылық мерзімі шегінде пайдалану;
- ластанған су көздерінде шомылмау;
- тырысқақ ауруынан қолайсыз елдерге сапарға шыққанда сақтық шараларын сақтау;
- тырысқаққа ұқсас белгілер пайда болғанда дереу медициналық көмекке жүгіну.
Осы қарапайым ережелерді сақтау – денсаулық пен қауіпсіз демалыстың кепілі!