10-20 мамыр аралығында Алматы облысында «Құқық тәртіп» жедел профилактикалық іс-шарасы өткізілді. Өңірлік коммуникациялар қызметінің алаңында Алматы облысы ПД Жергілікті полиция қызметінің басқарма басшысы полиция подполковнигі Мұрат Қалиасқаров жүргізілген тексеріс бойынша толықтай баяндады.
Спикердің айтуынша, іс-шараның басты мақсаты – қылмыстарды ізін суытпай ашу, құқықбұзушылықтарды, соның ішінде жол ережесін өрескел бұзғандарды анықтау.
Жедел алдын алу шарасы он күн бойы өткізіліп, облыстық полиция күшейтілген режимда жұмыс істейді. Мәселен,профилактикалық аптаға 700-800 полиция қызметкері жұмылдырылады. Бұл тексеріс жұмыстары өз кезегінде жалғасын тауып, екінші кезең маусым айының бірінші он күндігіне жоспарланған.
«Тексереріс барысында бұрын жасалған санатқа кіретін 50 қылмыс ашылды. Олардың арасында бір кісі өлтіру бар. Полиция қызметкерлерінің күшімен іздеуде жүрген 14 қылмыскер мен 16 заңсыз иммигрант ұсталды. Сонымен қатар, есірткі сақтады деген күдікпен 10 адам ұсталды, ал 12 адам суық қаруды заңсыз сақтағаны, алып жүргені үшін жауапқа тартылды», — деді Мұрат Қалиасқаров.
Операция қорытындысы бойынша полицейлер профилактикалық есепте тұрған 6184 адамды тексерді, оның 54-і құқықбұзушылық үшін ұсталды. Облыс аумағында 10 мыңнан астам адам әкімшілік құқықбұзушылық бойынша тіркелді. Атап айтсақ, 673 тұлға алкогольдік ішімдіктерді ішу немесе қоғамдық орындарға масаң күйде бару, 57 жүргізуші көлік құралын мас күйде басқарғанына және 328 тұлға ұсақ бұзақылық үшін әкімшілік жазаға тартылған.
