Бүгін, 23 тамызда, Іле ауданының Өтеген батыр ауылында ұлттық ойындардан сайыстар өтті. Оған ауыл тұрғындары мен 100-ге жуық бала қатысты, деп хабарлайды Halyqmedia.kz.
Қатысушылар асық ату, тоғызқұмалақ, бес тас және арқан тартыстан бақ сынады. Сондай-ақ шахмат пен дойбы ойындары ұйымдастырылды.
Бір алаңда бірнеше буын бас қосты
Асық атуда қатысушылардың мергендігі сыналса, бес таста шапшаңдық пен ептілік қажет болды. Тоғызқұмалақ, шахмат пен дойбыда логикалық ойлау қабілеті сарапқа салынды. Ал арқан тартыс командалық үйлесім мен күшті талап етті.
Сайыстарға балалармен қатар ересектер де белсенді қатысты. Осылайша, ұлттық ойындар алаңы бірнеше буынды бір ортаға жинап, дәстүр сабақтастығын дәріптеген шараға айналды.
