Шеберлік сабағы аритмолог-дәрігер Қанат Ергешев, бағдарламашы-менеджер Нұрдәулет Сүлейменнің жетекшілігімен Қарасай клиникалық көпсалалы орталық аудандық ауруханасының эндоваскулярлық хирургия бөлімшесінің меңгерушісі Орынбасар Тайманұлының қатысуымен өткізілді. Аясында ауыр созылмалы жүрек жетіспеушілігіне шалдыққан екі науқасқа CRT-D және ICD импланттау жүргізілді. Ота сәтті өтіп, қазірде науқастардың жағдайы қанағаттанарлық деңгейде. Қазірде қос тұрғын үйлеріне шығарылуға дайындалып жатыр.
«Қазіргі таңда созылмалы жүрек жетіспеушілігі кардиологияның маңызды мәселелерінің бірі болып табылады. Жыл сайын сырқаттанушылық 100 000 халыққа шаққанда 5-8 жаңа жағдай. Әлем бойынша жыл сайынғы өлім көрсеткіші 7-14%. Науқастарды емдеудің негізгі қағидасы – өмірді ұзарту және оның сапасын арттыру. Бірақ, өкінішке орай, барлық дәрі-дәрмектерді қабылдаған кезде де, пациенттердің жағдайын жақсарту әрдайым мүмкін емес . Бивентрикулярлы кардиостимулятор деп аталатын бұл құрылғы микросхемалар мен батареядан тұрады», — деді аритмолог-дәрігер Қанат Ергешев.
Статистикаға сүйенсек, жылына АҚШ-та 400 000, Ресейде 52 000-ға жуық, Қазақстанда 5 600 импланттау жүргізіледі. ТМД көрсеткішіне сүйенсек, дилатациялық кардиомиопатия имплантациясы жылына 100 000 халыққа шаққанда 28-30 адамда кездеседі. Ал АҚШ-та 130 факті тіркеледі.
Айта кетерлігі, бұрын соңды хирургиялық жолмен емдеудің бұл түрін алу үшін науқастар республикалық емханалардың немесе ірі медициналық мекемелердің мамандарына жүгініп, отаны ұзақ күтетін.
Қарасай ауданында CRT-D және ICD импланттау технологиясы енгізілуімен тұрғындар міндетті медициналық сақтандыру аясында уақтылы, сапалы медициналық қызмет ала алады.
