Алматы облысында тілме ауруына шалдыққан азамат МӘМС есебінен қажетті медициналық көмек алды. Бұл дерт – терінің жедел қабынуы. Аурудың қоздырғышы – стрептококк бактериялары. Ауру жедел басталады. Науқас қалтырап, дірілдеп, дене қызуы 39 – 40С-қа көтеріліп, сандырақтай бастайды. Басы ауырып, құсады. Жарақаттанған тері қатты қызарып, ісінеді. Терінің сау жері мен ауырған жерінің шекарасы анық көрінеді. Қонаев қалалық көпсалалы ауруханасына 64 жастағы тұрғын осындай белгілермен түскен.
«Мен ауруханада 10 күннен аса жаттым. Ешқандай дәрі-дәрмек сатып алмадым. Міндетті әлеуметтік медициналық сақтандыруға келетін болсақ, шынымен де өте тиімді. Себебі мен зейнеткермін. Алда тамыр хирургіне барамын. Портал арқылы ота жасатамын», — дейді науқас.
Бұған дейін науқаста варикоз ауруы болған. Бұл аяқтағы вена қан тамырларының кеңейіп түйінделуі. Кейіннен ол тілме ауруына ұласқан.
«Мұндай аурулар инфекциялық бөлімде МӘМС шеңберінде тегін емделеді. Жалпы, тілме асқынғанда өзге түрлі қауіпті ауруларға әкелуі мүмкін. Аурудың белгісі білінісімен дәрігерге қаралу керек. Емді дәрігер белгілейді. Үйде қызарған теріге әр түрлі майлар, йод жағуға, ыстық басуға болмайды. Тілме дұрыс емделмеген жағдайда қайталана береді. Аурудың алдын алу үшін жеке бастың гигиенасын сақтау қажет. Тілмені жұқтырып алмас үшін, оны ұстап көргеннен кейін қолды сабындап жуып, спиртпен сүрту керек», — дейді Жұқпалы аурулар бөлімінің дәрігері дәрігер Нахилям Аскарова.
Науқас ауруханада 2 апта емделгеннен кейін үйіне қайтарылған. Бүгінде жағдайы жақсы. Жалпы, Қонаев қалалық көпсалалы аурухасында тілме сияқты қауіпті ауруларды емдеуге барлық жағдай жасалған. Қазірде жұқпалы аурулар бөлімінде ересектермен қатар балалар да түрлі аурумен ем қабылдауда.
