ҚР Халық әртісі Нұрғали Нүсіпжанов туған күні қарсаңында Алматы облысының «Құрметті азаматы» атанды. Ән өнерінің дарабозына облыстық мәдениет, архивтер және құжаттама басқармасының басшысы Данияр Әлиев өңір әкімі Марат Сұлтанғазиевтің құттықтауы мен жылы лебізін жеткізді.
Әнші, Қазақстанның мемлекеттік сыйлығының лауреаты, «Парасат», «Құрмет» ордендерінің иегері Нұрғали Нүсіпжанов 1937 жылдың 5 қаңтарында қазіргі Жетісу облысының Кербұлақ ауданы Доланалы ауылында дүниеге келген. Мектеп жасынан бастап ән өнеріне құмартып, 19 жасында кәсіби, жан-жақты білім алуды қолға алады. 1956 жылы музыка өнерінің қара шаңырағы Құрманғазы атындағы Қазақ ұлттық консерваториясына оқуға қабылданды. Мұнда ол белгілі ұстаз – Қазақстанның халық әртісі Надежда Николаевна Самышинаның класында жеті жыл оқыды. Консерваторияны бітірген соң Абай атындағы Қазақ мемлекеттік академиялық опера және балет театрына қызметке жіберілген. Осы кезден бастап еліміздің кей аймақтарында концерт бере бастапты. Мұнда екі жылдай әншілік қызмет атқарған.
Бұдан кейін Нұрғали Нүсіпжанов Қазақ телевизиясы мен радио хабарларын тарататын мемлекеттік комитетінде қызмет етеді. Бұл ұжымда музыкалық хабарлар редакторлығынан редакция меңгерушісіне дейін көтерілді. 1976 жылы Құрманғазы атындағы академиялық халық аспаптары оркестріне жетекші әншілікке қабылданды. Осы сәттен бастап әншілік шеберлігін шыңдап, халық ықыласына бөленеді.
Нұрғали Нүсіпжановқа арнап Нұрғиса Тілендиев «Саржайлау», «Ақ құсым», «Балдызым», «Куә бол», «Әкеме», «Әжеме», «Жетісуым», «Қапшағай», «Келе жатыр құс қайтып» сынды жиырмаға жуық ән жазған. Ол М.Маңғытаевтың «Сағыныш», Ә.Бейсеуовтың «Айнашым», «Мұңайма», «Аспан қызы», Қ.Қуатбаевтың «Қарындас», «Шолпаным», Т.Базарбаевтың «Қаздар қайтқанда» сияқты көптеген эстрадалық әндерін сахнаға алып шыққан.
Әнші Құрманғазы атындағы оркестрде 20 жыл жетекші әнші болып қызмет атқарған соң, «Қазақконцерт» бірлестігі жанынан «Жазира» атты аспаптық ансамблін ашты. Сол кезден бастап әнші жас таланттарды
таңдауға, ансамбльге тартуға кіріседі.
Әрі қарай ансамбль ел өңірлері мен шет мемлекеттерде концерт берді.
Халқына өшпейтін үн, өлмейтін ән сыйлаған Нұрғали Нүсіпжанов бүгінде ел мәдениетін ілгерілету жолында еселі еңбек етіп жүр.