Қазақстан Республикасының Тәуелсіздік күні – халқымыздың дербес ел болу жолындағы күресінің мәртебелі нәтижесі мен бүгінгі жетістіктерінің символы. Жыл сайын 16 желтоқсанда аталып өтетін бұл күн – ел тарихындағы ең маңызды әрі қастерлі даталардың бірі.
Облыстық жастар саясаты мәселелері жөніндегі басқармасының маманы Нұрбек Ормановтың айтуынша, Тәуелсіздік тек мемлекеттің саяси егемендігін білдіріп қана қоймай, әрбір азаматтың өз елінің тағдырына жауапты екенін еске салатын ерекше құндылық.
«Қазақстанның тәуелсіздікке қол жеткізуі – бір күндік оқиға емес, бұл бірнеше ғасырлық күрестің нәтижесі. Қазақ халқы өз ұлттық болмысын, тілін және мәдениетін сақтау жолында тынымсыз күрес жүргізді. Тәуелсіздік – осы ұмтылыстың тарихи әділ қорытындысы», – дейді ол.
Тәуелсіздікке апарар жолда қазақ халқы көптеген сынақтан өтті. Нұрбек Ормановтың пікірінше, Желтоқсан оқиғасы егемендікке ұмтылған ұлттың өршіл рухын көрсеткен ерекше кезең болды.
«1986 жылғы Желтоқсан оқиғасы – халқымыздың ұлттық намысы мен болашаққа деген сенімінің көрінісі. Сол кездегі тоталитарлық режимге қарамастан, қазақ жастары өз елінің дербестігі үшін үн көтерді. Бұл оқиға тәуелсіздік идеясының оянуына ықпал етіп, еліміздің егемендікке қол жеткізуіне негіз қалады», – деп атап өтті маман.
Қазақстан тәуелсіздік жылдарында экономикалық, әлеуметтік және мәдени тұрғыдан айтарлықтай жетістіктерге жетті. Ел бірлігі мен бейбітшілікке негізделген саясаттың арқасында мемлекетіміз әлемдік аренада лайықты орын алды.
«Ұлы дала – біздің тарихи отанымыз, ұлттық кодымыздың негізі. Біз бірлік, бейбітшілік және жаңашылдық секілді құндылықтарды сақтай отырып, елімізді одан әрі дамытуымыз керек. Тәуелсіздікті сақтау және оны нығайту – әрбір азаматтың қасиетті борышы», – деп қорытындылады Нұрбек Орманов.
Қазақстанның Тәуелсіздік күні – халқымыздың өткен тарихына құрмет көрсетуімен қатар, болашаққа бағыт беретін маңызды мереке. Бұл күн әрбір қазақстандық үшін ұлттық мақтаныш пен ортақ жауапкершілік сезімін ұялатады.
