Жетісу облысының зейнеткерлері тегін заңгерлік кеңес алды. Мұндай мүмкіндікті оларға Жетісу облысының Нотариаттық палатасының өкілдері ұсынды. Игі акция Талдықорған қаласының белсенді ұзақ өмір сүру орталығында өтті. Оның қатысушылары өз сұрақтарын қойып, білікті нотариустардан жауап ала алды. Өтініштердің тақырыбы әртүрлі сипатта болды. Әсіресе, ата-әжелер мұрагерлік құқықтарды ресімдеу және өсиетті ресімдеу мәселелеріне қызығушылық танытты.
«Тегін кеңес беру күні — «халық үніне құлақ асатын мемлекет» элементтерінің бірі. Бүгінде мұндай іс-шаралар халықтың мемлекеттік органдармен өзара іс-қимылына көмектеседі. Жыл сайын акция көмек көрсететін субъектілердің үлкен шеңберін қамтиды деп ойлаймын. Біздің есігіміз әрбір талдықорғандық үшін ашық. Тілек білдірушілер кез келген уақытта нотариаттық палатаға жүгініп, өздерін қызықтырған мәселелер бойынша кеңес ала алады», — деді Жетісу облысының нотариаттық палатасының төрағасы Бекішбаев Арман Сейітжапарұлы.
Акция барысында тұрғындар өздеріне қажетті ақпараттарды алып, заңгерлерге дән риза болды. Қатарында Банугүл Оспанова да бар.
«Қолымыз нотариусқа жетпей жүр еді. Мұндай тегін кеңес беретін акциялардың біз сияқты қарапайым тұрғындарға берері мол. Ұйымдастырушыларға алғысымды білдіремін. Нотариустар бізге келді, енді ешқайда барудың қажеті жоқ. Ақпарат пайдалы болды. Жүгінген мәселем бойынша шешімін айтып, әрі қарай не істеу керектігі туралы кеңес берді. Арман Сейітжапарұлына рахмет! Ол және әріптестері бізге уақыт бөліп, не істеуге және қалай әрекет етуге кеңес берді», — деді тұрғын.
Ұйымдастырушылардың айтуынша, алда «Нотариус кеңес береді» атты акция дәстүрлі түрде өткізіліп тұрмақ.