Бүгінгі күні Жетісу облысының мәдениет және архив мекемелерінің желісі 309 нысан. Өңірлік коммуникациялар қызметінің ақпараттық алаңында мәдени ошақ қызметкерлерінің 10 айда атқарған жұмыстары жайлы Жетісу облысының мәдениет, архивтер және құжаттама басқармасының басшысы Сүлейменов Қуаныш Сұлтанұлы мәлімдеді.
Облыстағы аталған салаға бөлінген бюджет — 11 млрд. 694 млн. теңгені құраған. Жеке кәсіпкерлердің септігі мен шығармашылық ынтасын арттырушы балалар үйірмелерге электронды тіркелуіне байланысты қаржы үнемделіп, ұттық қорға 830 млн. теңге қайтарылды.
«Берілген қаржы өңірдегі бірқатар аудандарда орналасқан мәдениет үйлеріне жөндеу және жаңа құрылыс жұмыстарын жүргізуге арналуда. Бүгінде Ақсу ауданы Ақсу ауылдық, Кербұлақ ауданы Жоламан ауылдық және Текелі қалалық мәдениет үйлерінің күрделі жөндеу жұмыстары өзінің сәтті мәресіне жетті. Ал Қаратал ауданы Кәлпе ауылдық мәдениет үйі және Үштөбе қаласындағы тарихи-өлкетану музейін ендігі ел қамына пайдалануға бердік», — дейді Қуаныш Сүлейменов.
Ал келесі жылы өңірдегі 5 нысанға, яғни Екпінді, Қоянкөз, Тұрпан, Көкпекті ауылдарындағы мәдениет үйіне және М.Тынышбайұлы атындағы тарихи-өлкетану музейіне күрделі жөндеу жұмыстары жоспарланған. Жаңадан бой көтеретін ғимараттарға келетін болсақ, Көкөзек, Еркін ауылдарына мәдениет үйі мен Кербұлақ ауданына аудандық кітапхана бұйырмақ.
Сондай-ақ баспасөз конференция қонағы Алакөл ауданы Ақжар ауылдық және Кербұлақ ауданы Қарашоқы ауылдық мәдениет ошағы 2024 жылы өз құрылысын аяқтайтынын жеткізді.
«2024 жылы Мұхамеджан Тынышбаевтың 145, Жәлменде Пышанның 140, Жүсіпбек Аймауытовтың, Мұстафа Шоқайдың 135, Ілияс Жансүгіровтің, Сәкен Сейфуллинның, Бейімбет Майлинның, Тұрар Рысқұловтың 130, Қаныш Сәтпаевтың 125, Әбілхан Қастеевтің, Әлкей Марғұланның 120, Шәкен Аймановтың 110, Бердібек Соқпақбаевтың, Рақымжан Қошқарбаевтың 100 жылдық мерейтойлары аталып өтіледі. Осындай біртуар тұлғаларды насихаттау мәдениет саласында басты мақсаттарымыздың бірі болмақ», — деді спикер.
Сонымен қатар Қуаныш Сұлтанұлы келесі жылы мәдениет күнін кең ауқымды телевизиялық жоба ретінде өткізетінін баяндады.