Көші-қон заңнамасын бұзудың жолын кесу үшін 11-15-ші наурыз аралығында елімізде «Мигрант» жедел-профилактикалық іс-шарасы өтті. Полиция қызметкерлері шетелдіктердің тұратын жерлерін, құрылыс обьектілерін, базарлар мен жалдамалы жұмысшыларды пайдаланатын ұйымдарды және жұмыс берушілерді тексерді. Нәтижесінде бес күн ішінде облыс бойынша 388 бұзушылық анықталды. Бұл туралы Б.Құранбек атындағы Журналистер үйінде БАҚ өкілдерімен кездесуде Жетісу облысының полиция департаменті көші-қон қызметі басқармасының бастығы Ерлан Раймбеков мәлімдеді.
«Жедел профилактикалық іс-шара барысында 388 бұзушылық анықтылды. Оның ішінде елде болу ережелерін сақтамағаны үшін 249 шетелдік әкімшілік жауапкершілікке тартылды. Соттың шешімімен елден ТМД-ның 17 азаматы, азаматтық сот ісін жүргізу тәртібімен 4 шетелдік шығарылды. Ал, 20 азамат жеке басын куәландыратын құжаттарсыз және белгілі бір тұрғылықты жерінсіз қабылдау-тарату мекемесіне қамауға алынды», — деді Ерлан Қабдоллаұлы.
Сондай-ақ, спикер шетелдіктерді уақтылы тіркеу жөніндегі шараларды қамтамасыз етпегені үшін әкімшілік жауаптылыққа Қазақстан Республикасының 116 азаматы тартылғанын айтты. Одан бөлек, шетелдік жұмыс күшін тарту қағидаларын бұзғаны үшін 23 жұмыс беруші тартылды.
Басқарма бастығының айтуынша, алдағы уақытта да облыс бойынша көші-қон заңнамасын бұзушылықтардың алдын алу және анықтау бойынша жұмыс жалғасатын болады.
