Сүйінбай атындағы Алматы облыстық филармониясына 6 ұйым қарайды. Биыл бұл қатарға ішекті симфониялық оркестр қосылды. Әзірге ұжымда 17 өнерпаз бар. Олар скрипка, виолончель, альт, кантробаст пен баян аспатарында ойнайды. Алдағы уақытта құрамды 21 адамға дейін толықтыру жоспарланған.
Аспап алуға бюджеттен 7 миллон 133 мың теңге бөлінген. Мемлекеттік сатып алуды ойластырып жатырмыз. Жақын арада қажетті инструменттерді аламыз. Бірақ құрамды әлі де толықтыруымыз қажет — деді, Сүйінбай атындағы Алматы облыстық филармония директоры Данияр Құрамысов.
Оркестр құрамындағы өнерпаздардың барлығы консерватория бітірген кәсіби мамандар. Дені түрлі халықаралық және республикалық конкурстар лауреаты. Ұжымның көркемдік жетекшісінің айтуынша, оларды іріктеуге 1 ай уақыт кеткен.
«Оркестр қоржынында қазір 25-тен аса шығарма бар. Ендігі мақсатымыз репертуарды көбейту. Бүгінгі таңда вокалдық әндерді сүйемелдеуге дайындалып, қызу жұмыс істеп жатырмыз «, — деді ішекті симфониялық оркестрдің көркемдік жетекшісі Мақсат Нұрлан.
Айта кетейік, ұжымның алғашқы концерті келесі айда өтеді деп жоспарланып отыр. Одан кейін өнерпаздар әуелі Алматы облысының аумағын, кейіннен республиканың басқа да өңірлерін араламақ.
