Жетісу облысында қант қызылшасын жинау науқаны қарқынды жүргізілуде, жедел штаб күнделікті өңірде қабылданып жатқан қант қызылшасы көлемін назарда ұстап отыр. Бұл туралы Өңірлік коммуникациялар қызметі алаңында өткен баспасөз брифингінде облыстық Ауыл шаруашылығы басқармасы басшысының орынбасары Бахтияр Шампиков мәлімдеді. Қазіргі уақытта 13,7 мың гектар қант қызылшасы алқабының 10,9 мың гектары жиналып, одан 526 мың тонна өнім алынды. Гектар өнімділігі 484,5 центнерден айналды, бұл өткен жылғы көрсеткіштерден жоғары және өңірдегі аграрлық сектордың тиімді жұмыс істеп жатқанын көрсетеді.
Жиналған өнімді өңдеу үшін облыстың екі негізгі қант зауытына – Көксу және Ақсу зауыттарына жеткізілуде. Бүгінгі күнге дейін зауыттарға 421,3 мың тонна өнім жеткізілді, оның ішінде: Көксу қант зауыты – 200,6 мың тонна, Ақсу қант зауыты – 220,7 мың тонна қабылдады.
Өнімді қабылдау және өңдеуге байланысты логистиканы үздіксіз ұйымдастыру және жедел шешімдер қабылдау мақсатында өңірде облыстық жедел штаб жұмыс істеуде. Орта есеппен зауыттар күніне 5-6 мың тонна өнім қабылдайды. Жүктерді бөлу және барлық қызметтердің үйлесімді жұмысы арқасында қант қызылшасын қабылдау мен өңдеу бекітілген кестеге сәйкес жүргізілуде.
Жинау науқаны барысында жергілікті ауылшаруашылық өндірушілеріне ерекше назар аударылды. Ескелді, Қаратал, Кербұлақ, Көксу аудандарында және Талдықорған қаласында орналасқан 66 шаруашылық жалпы көлемі 33,2 мың тонна өнім өткізіп, жалпы өнім көлеміне елеулі үлес қосуда.
Науқан соңына дейін қалған 2,8 мың гектар егістік алқаптан 118 мың тонна өнім алу жоспарда.